موقع بورصات
  بورصات
تسجيل عضوية جديدة في المنتديات لوحة تحكم العضو البحث في المنتديات تسجيل الخروج الرئيسية الاتصال بنا

منتدى العملات العام لمتابعة كل ما يتعلق بتجارة العملات الاجنبية والذهب والنفط من اخبار وطرق المتاجرة وتحليلات ، قسم التوصيات – توصيات العملات لمتابعة توصيات ونقاط الدخول والخروج على مختلف العملات ، منتدى الدروس التعليمية يحتوي على دروس تعليمية لسوق العملات والتحليل الفني والاساسي وادارة رأس المال ، منتدى المؤشرات والاكسبيرتات يحتوي على اهم المؤشرات مع شرح لها بالاضافة الى بعض الدروس

العودة   بورصات > بورصة العملات الاجنبية > منتدى تداول العملات العام

الدرس الأول من دورة إزاي تكسب من سوق الفوركس؟

منتدى تداول العملات العام

Like Tree60Likes

إضافة رد
 
أدوات الموضوع
قديم 03 - 04 - 2014, 03:57 PM   #1
عضو خبير
 
الصورة الرمزية شادي عبده
 

افتراضي الدرس الأول من دورة إزاي تكسب من سوق الفوركس؟

الدرس الأول من دورة إزاي تكسب من سوق الفوركس؟
بسم الله الرحمن الرحيم

السّلام عليكم ورحمة الله وبركاته

النهاردة إن شاء الله هنبدأ أول درس من دروس دورة إزاي تكسب من سوق الفوركس، واللي اتكلمنا عنها في الموضوع دا: اضغط هنا



في أول درس النهاردة هندردش مع بعض عن بعض المصطلحات الهامة في صورة قصة مسلية بسيطة هتوضح كل شئ إن شاء الله..


قبل كل حاجة لازم نوضح مفهوم بسيط جدًّا هو أن الفوركس بورصة

كتير من الناس بيعتقدوا ان البورصة بس هي الأسهم، ودا مفهوم خاطئ تمامًا

لان تعريف كلمة بورصة بيقول ان البورصة هي عبارة عن سوق تجاري ضخم بيتم فيه البيع والشّراء

والبورصة منها أنواع، يعني مثلا في حاجة اسمها بورصة الطاقة، وبورصة الأوراق المالية (الاسهم والسندات)، وبورصة المعادن (زي الدهب والفضّة والنحاس).. لكن في ناس ماتعرفش ان في حاجة اسمها بورصة العملات (اللي هي الفوركس)...

يبقى ببساطة شديدة الفوركس هو عبارة عن بورصة وبرضه ممكن نطلع بتعريف بسيط لسوق الفوركس ونقول انه عبارة عن سوق تجاري ضخم بيتم فيه بيع وشراء العملات الدولية! بورصة لان بيحصل فيها بيع وشراء، ولكن الاداة اللي هنبيعها ونشتريها مختلفة (العملات)...

بسيط الكلام لحد هنا؟؟

عشان تقدر تشتغل في سوق الفوركس ويكون عندك القدرة أنك تعمل فلوس لازم تفهم كويس طبيعة السّوق اللي أنت مقبل على العمل فيه.. خليني اتكلم عن مثال بسيط هيوضح مصطلحات كتير جدااااااا يمكن كتير من الكتب اللي بتشرح الفوركس مابتقدرش انها ببساطة توصل المعلومة لان الكلام فيها مكلكع شوية...

تعالى نفهم السّوق بيشتغل ازاي؟؟

خليني ابدأ معاك بمثال بسيط جدًّا.. لنفرض مثلا انك عايز تسافر أمريكا...


من الطبيعي انك عشان تسافر أمريكا لازم يكون معاك دولار أمريكي...

ليه طيب؟

لأن عملة أمريكا هي الدولار الأمريكي ولانه ماينفعش انك تشتري حاجة في أمريكا وتدفع مقابل شرائها الجنيه المصري... ماحدش هيقبله منك هناك!!

فعشان كدا قبل السّفر هتحسب أنت عايز قد ايه دولارات ولنفرض مثلا انك هتحتاج 1000 دولار أمريكي (في الواقع انت هتحتاج اكتر من كدا بكتير بس دا مجرد مثال لتقريب الصورة)..

اول حاجة هتعملها انك هتدور على مكان عشان تشتري منه الدولار الأمريكي، فهيبقى المكان دا هو الصرافة (أي مكتب صرافة)..




هتروح لمكتب الصرافة وهتقول للصرّاف: لو سمحت عايز اشتري 1000 دولار أمريكي..



هيرد عليك الصراف ويقولك: أن سعر شراء الدولار الأمريكي هو 7 جنيه...

يعني ايه الكلام دا؟

يعني ببساطة شديدة أن كل دولار أمريكي يساوي 7 جنيه مصري..

خليني هنا أوضحلك نقطة مهمة...

اما بتروح مكتب الصّرافة، بيوفرلك الصراف سعرين:

سعر الشّراء واللي بنسميه في سوق الفوركس ASK

وسعر البيع واللي بنسميه في سوق الفوركس BID


سعر الشّراء: هو السّعر اللي أنت هتشتري بيه من الصراف.. اللي هو 7 جنيه مصري لكل دولار.

سعر البيع: هو السّعر اللي هتبيع بيه للصراف (في حالة كان معاك دولار وعايز تستبدله بالجنيه المصري).. اللي هو مثلا 6,9960 جنيه مصري لكل دولار (6 جنيه و 99 قرش تقريبًا)..


بما انك عايز تشتري، يبقى الصراف هيطلب منك انك تدفع بسعر الشّراء اللي هو 7 جنيه مصري لكل دولار أمريكي..

يبقى بحسبة بسيطة جدًّا.. عشان تحصل على 1000 دولار أمريكي، لازم تدفع 7000 جنيه مصري.. (ودا بسميه النظام التقليدي في بيع وشراء العملات.. يعني عشان تحصل على شئ معين ، لازم تدفع قيمته كاملة)..

تمام لحد كدا؟

لو لاحظت في الكلام السّابق هتلاقي اننا كنا بنتكلم عن عملتين:

الدولار الأمريكي مقابل الجنيه المصري

العملتين دول اسمهم زوج عملة

تمام؟

زوج العملة دا مابيتكتبش بحروف عربية!! ولكن بيتكتب بالشكل التالي:

الدولار الأمريكي يرمز له ب USD
الجنيه المصري يرمز له ب EGP

إذن زوج العملة بيبقى بالشكل دا:



تفهم ايه من الكلام دا؟

ببساطة عشان تشتري 1 دولار أمريكي لازم تدفع 7 جنيه مصري أو لو معاك واحد دولار مثلًا وعايز تبيعه، هتأخد مقابله 6,9960 جنيه مصري (يعني 6 جنيه و99 قرش تقريبًا)..

هل لاحظت إن في فرق سعر بين سعري الطلب والعرض؟

هتلاقي ان الفرق تقريبًا يساوي:

0,0040


ودا بنسميه سبريد spread
والسبريد بيختلف على حسب زوج العملة وكمان يختلف من شركة وساطة لاخرى

السبريد spread هو عبارة عن أجرة السمسار (الوسيط) اللي بيحصل عليها من خلال الفارق بين سعر الطلب والعرض مقابل الخدمات اللي بيوفرها لك من دخول السوق وتحليلات وأخبار ودعم فني وتقني .. الخ

تعالى نرجع تاني لزوج العملة..


لو لاحظت الرسم التوضيحي التالي، هتلاقي ان زوج العملة بيتكون من طرفين زي ما وضحنا قبل كدا.. الطرف الأول في أي زوج عملة يسمى "عملة أساس Base Currency" والطرف التاني يُسمى "عملة تسعير Quote Currency" وهي العملة المُسعّر بيها الطرف الأول.





عايزك تركّز معايا في الجزء اللي جاي


هفرض معاك انك خلاص نويت تسافر امريكا فروحت شاري 1000 دولار امريكي مقابل بيع 7000 جنيه مصري عند سعر صرف 7 جنيه لكل دولار أمريكي

افتكر كويس، أنت اشتريت الدولار عند سعر صرف 7 جنيه (سعر شراء الدولار الأمريكي).. تمام؟

بعد ما أنت حولت الفلوس، سافرت امريكا، وقعدت هناك مثلا شهرين.. وتخيل كدا انك ماصرفتش ولا سنت تخيل يعني مش اكتر

بعد شهرين انت رجعت مصر وبفرض انك ماصرفتش ولا سنت من الفلوس اللي معاك، تعالى نتخيل سيناريوهين:

السيناريو الأول:

وصول سعر صرف الدولار الأمريكي مقابل الجنيه المصري إلى 8 جنيه لكل دولار أمريكي

دا معناه ايه؟
معناه ببساطة شديدة ان كمية 1000 دولار اللي معاك اصبح قيمتها 8000 جنيه.. ليه؟ لانك اشتريت الدولار من شهرين بسعر 7 جنيه.. إذن انت كسبان دلوقتي 1000 جنيه مصري.. ودا هيحصل اما تروح للصراف وتبيع له الدولار الأمريكي وتشتري الجنيه المصري مرة تانية.


السيناريو التاني:

وصول سعر صرف الدولار الامريكي مقابل الجنيه المصري إلى 6 جنيه لكل دولار أمريكي

دا معناه ايه؟
معناه ببساطة ان كمية 1000 دولار اللي معاك اصبح قيمتها 6000 جنيه مصري... ليه؟ لانك اشتريت الدولار من شهرين بسعر 6 جنيه.. إذن أنت خسران دلوقتي 1000 جنيه مصري.. ودا هيحصل اما تروح للصراف وتبيع له الدولار الأمريكي وتشتري الجنيه المصري مرة تانية.

تكلمة الشرح في المشاركة الجاية..

اذا اعجبك الموضوع و اردت نشره في المنتديات الاخرى فاستخدم هذا الرابط:
الدرس الأول من دورة إزاي تكسب من سوق الفوركس؟
http://www.borsaat.com/vb/t644538.html




التعديل الأخير تم بواسطة شادي عبده ; 26 - 04 - 2014 الساعة 12:30 PM
شادي عبده متواجد حالياً   رد مع اقتباس
قديم 11 - 04 - 2014, 01:45 PM   #2
عضو خبير
 
الصورة الرمزية شادي عبده
 

افتراضي رد: الدرس الأول من دورة إزاي تكسب من سوق الفوركس؟

بنفس القياس الكلام دا بيتم في سوق الفوركس عالميًّا، ولكن الفرق هو الهدف من استبدال عملة بأخرى.. يعني ايه؟

يعني أنا اما عملت الحكاية اللي فوق بتاعت استبدال الدولار بالجنيه المصري، كان هدفي السّفر، فماكانش هيفرق معايا اذا سعر الصّرف ارتفع أو انخفض.. يعني الربح والخسارة مش في الحسبان اصلًا...

إنّما اما بعمل الحكاية دي في سوق الفوركس، فانا ببساطة شديدة بحاول اشتري رخيص وابيع غالي.. يعني مثلا لو في عربية في السّوق سعرها 100.000 جنيه مصري وأنت متوقع ان سعرها يرتفع إلى 150.000 جنيه.. من المنطقي انك تشتريها دلوقتي بالسّعر المنخفض دا، وبعدين ترجع تبيعها بسعر أعلى وبالتالي تأخد الفرق في جيبك (الفرق بين سعر الشّراء والبيع) ودا مكسبك طبعًا..

تمام لحد كدا؟

تعالى نأخد خطوة تقربنا أكتر لسوق الفوركس.. سيبك بقى من الجنيه المصري والمحليات دي.. خلينا ندخل على العملات اللي هتاجر عليها فعلًا في السوق..

هتلاقي في منصة التداول اللي هنشرحها في الدرس اللي جاي، بعض العملات الدولية اللي عليها هيتم التداول.. زي ايه مثلا؟

اليورو الأوروبي : EUR
الجنيه الإسترليني : GBP
الدولار الأمريكي : USD
الين الياباني : JPY
الفرنك السويسري : CHF
الدولار الكندي : CAD
الدولار النيوزيلاندي : NZD
الدولار الاسترالي : AUD
الذهب : GOLD
الفضّة : SILVER

العملات دي هي اللي هيتكون منها أزواج العملات،، واللي أنت هتقوم ببيعها وشرائها..

جميل؟ أكيد جميل

فيما يتعلق بالعملات.. هتلاقي ان في حياتنا العادية انك عشان تشتري 1 دولار أمريكي عند سعر صرف 7 جنيه مصري.. هيطلب منك الصرّاف 7 جنيه مصري عشان تأخد منه 1 دولار أمريكي.. تمام؟ طيب لو أنت عايز تشتري 1000 دولار أمريكي؟ يبقى لازم تدفع الكمية دي مضروبة في سعر صرف الدولار مقابل الجنيه المصري.. صح؟ يعني بحسبة بسيطة 1000 دولار أمريكي * سعر صرف 7 جنيه = 7000 جنيه مصري.. يبقى عشان تحصل على 1000 دولار، لازم تدفع مقابلهم 7000 جنيه مصري كاملين..

انا ماضفتش جديد لحد كدا، لان دا فعلا بيحصل كل يوم في أي مكان في العالم مع اختلاف العملات

امال ايه الجديد بقى؟؟

الجديد بقى ان في حاجة اسمها مضاربة.. المضاربة معناها انك تعرف ازاي بذكاء انك تستفيد من التحركات السّعرية.. وعشان تعمل حاجة زي كدا.. لازم تبيع وتشتري بنفس النظام السابق.. بس في مشكلة للاسف الشديد وهي ان مش كل الناس معاها قيمة 7000 جنيه مصري اللي هما قيمة الدولار الأمريكي بالجنيه المصري... مممممم.. دي فعلا مشكلة.. بس حلّها بسيط جدًّا وهو يتلخص في جملة: العمل بالنظام الهامشي، والرافعة المالية..

ايه يا عم الكلام المجعلص دا؟؟؟

استنى عليّ.. الموضوع ابسط مما تتخيل..

تعالى معايا تاني للكلام اللي كنّا قولناه قبل كدا.. فاكر اما قولتلك ان هدفنا المضاربة؟ وطالما هدفنا المضاربة فانا بحاول اشتري رخيص وابيع غالي.. وطالما هاشتري رخيص وابيع غالي إذن لازم اوفر قيمة الشئ اللي انا عايز اتاجر عليه بالكامل عشان اقدر اخد مقابله الشئ اللي انا متوقع ارتفاع سعره..؟؟

صح الكلام دا؟

تمااااااااااااااااااااام

بس في خبر حلو..

أنت مش لازم يكون معاك قيمة الشئ أنت عايز تضارب عليه بالكامل...

ايه؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟



اه والله زي مابقولك كدا

يعني أنت مش لازم يكون معاك 7000 جنيه مصري عشان تشتري 1000 دولار أمريكي وتضارب عليه..

إيه رأيك لو قولتلك وفّرلي جزء بسيط من قيمة الدولار بالجنيه المصري (يعني جزء بسيط من 7000 جنيه) وأنا هادخلك السّوق وكأنك بالظبط اشتريت 1000 دولار أمريكي...

طبعًا زمانك بتقول:
دول ناس طيبة قوي يا خال.. طب ما في ناس ممكن تأخد الفلوس وتخلع!!!!!!!

ارد عليك بقى:

طبقًا للعمل تحت النظام الهامشي واستخدام الرافعة المالية، لا يمكن للعميل (اللي هو حضرتك) التحصل على الكمية التي يرغب بالمتاجرة عليها بشكل مادي.. ولكن كل التعاملات تتم عن طريق سجلات الشركة بحيث تحجز لك الشّركة المبلغ الذي تريد المتاجرة عليه، دون استلامه بشكل مادي؛ وذلك حتى تضمن الشّركة حقها لدى العميل...

يعني ببساطة شديدة، لو توقعت ان سعر صرف الدولار الأمريكي يرتفع مقابل الجنيه المصري من 7 إلى 8 جنيه.. روح اشتري الدولار دلوقتي.. وحاول تشتري كمية كبيرة عشان يبقى العائد كويس.. طيب لو ماقدرتش تشتري كمية كبيرة؟

هنا بقى بقولك مافيش مشكلة؛ لان العمل بالنظام الهامشي حل المشكلة..

العمل بالنظام الهامشي بيقولك لو انت معاك 2% أو 1% أو 0.50% أو 0.25% أو 0.20% من قيمة الشّئ اللي أنت عايز تشتريه... ممكن تدخل السّوق وتتحصل على الشئ دا وتستفيد من التغيرات السعرية بدون الحاجة إلى امتلاك قيمة الشئ بشكل كامل.....

تعالى نأخد مثال بسيط كدا نوضح الصورة ونوضح بعض المفاهيم الأخرى:

هافترض معاك ان سعر اليورو مقابل الدولار الأمريكي = 1.3500
يعني عشان تحصل على 1 يورو أوروبي، لازم تدفع دولار و 35 سنت

لو كانت قرائتك للسوق صحيحة، وتوقعت أن سعر اليورو مقابل الدولار هيرتفع من 1.3500 دولار إلى 1.3600 إذن دا معناه انك توقعت ان الزوج هيرتفع.. ولكن العائد بتاع الارتفاع دا هيكون شئ لا يذكر لانك مش معاك غير واحد يورو بس.. لذلك في كميات (عقود) بتقدمهالك شركات الوساطة وبحد ادنى للكمية بحيث تقدر تحس بالتغيرات اللي ممكن تحصل في السوق.. لان الاسعار بتتحرك في اجزاء من الالف وبالتالي مش هتقدر تحس بالتغير إلّا إذا كان معاك كمية كبيرة..

تخيل معايا كدا انك داخل سوق الخضار
وسمعت معلومة ان الطماطم سعرها هيرتفع من 4 جنيه للكيلو ل 6 جنيه للكيلو
فقولت في بالك، طيب ليه ماشتريش دلوقتي الطماطم بسعر رخيص وارجع ابيعها بسعر اعلى واكسب انا الفرق..

تفكيرك صحيح تمامًا.. في الحالة دي، هتروح لتاجر طماطم محترم وهتقوله بعد اذنك أنا عايز اشتري كيلو طماطم.. هيقولك اوكي

هتشتري كيلو الطماطم بسعر 4 جنيه للكيلو.. وبعد يومين مثلا سعر الطماطم ارتفع فعلا من 4 ل 6 جنيه.. فهنا السوق وصل لمستهدفك السعر، فهتروح بايع الطماطم وهتأخد 6 جنيه.. يبقى مكسبك قد ايه؟ 2 جنيه، صح؟

طيب تخيل معايا لو كنت اشتريت 2 كيلو؟ أو 10 كيلو؟ أو 100 كيلو؟ أو 1000 كيلو؟ مكسبك كان هيبقى اضعاف مضاعفة..

نفس المبدأ دا في سوق الفوركس أو اي سوق تاني.. احنا بنحاول نشتري كميات كبيرة عشان نحس بالفرق في السعر وبالتالي بالعائد وبدون مايكون معاك تمن الكمية اللي انت عايزها بشكل كامل؛ لاننا اتفقنا اننا بنتعامل تحت سقف النظام الهامشي، والرافعة المالية..

لذلك، شركات الوساطة (شركات الفوركس) بتقدملك كميات معينة ممكن تشتغل عليها دون الحاجة إلى توفير قيمة الكمية بشكل كامل..

تعالى ندخل على تقسيم بسيط للكميات دي:

أحجام العقود وقيمة النقطة

العقود بتنقسم إلى 3 أنواع:

في حاجة اسمها عقد ميكرو
يعني ايه؟
يعني 1000 وحدة من زوج العملة..

(كلمة وحدة معناها عملة اساس، اللي هي الطرف الأول في أي زوج عملة)..

اما اقولك 1000 وحدة من زوج اليورو/ دولار
فدا معناه ببساطة شديدة 1000 يورو أوروبي

سهل كدا؟

طيب لو قولتلك 1000 وحدة من زوج الاسترليني / دولار
دا معناه 1000 جنيه استرليني

طيب لو قولتلك 1000 وحدة من زوج الدولار / ين
هاااااااااا؟ ايوة بالظبط كدا زي ما أنت قولت

طبعًا، الكلام دا معناه انك عايز تتاجر على 1000 وحدة من زوج العملة دا.. واضح؟

طيب، هل العمل يقتصر على 1000 وحدة بس؟

لا طبعًا.. بس ماينفعش تتاجر على أقل من 1000 وحدة.. المتاجرة على 1000 وحدة مضاعفاتها بس..

وعشان كدا، عملتلك توضيح في جدول بسيط هيسهل عليك الامور كتير جدا...


طبعا الكلام دا ومضاعفاته.. يمكن ممكن تقول 2000 وحدة وبالتالي تتضاعف قيمة النقطة وتصبح 20 سنت وهكذا..

خليني اديك مثال توضيحي:

لو افترضت انك اشتريت 10.000 وحدة من زوج اليورو / دولار عند سعر صرف 1.3600

دا معناه ان لو سعر الصّرف صعد إلى 1.3601 .. معناها انك كسبان 1 دولار.. ليه؟ لان قيمة النقطة = 1 دولار.. وبنفس القياس، لو سعر الصّرف هبط إلى 1.3599 دا معناه انك خساران 1 دولار..


لاحظ هنا

في النظام التقليدي، عشان تقدر تشتري 10.000 يورو أوروبي لازم تدفع قيمتهم بالكامل بالدولار الأمريكي.. صح؟

يعني اما اقولك ان كل يورو أوروبي = 1 دولار و 35 سنت.. إذن، عشان تحصل على 10.000 يورو، لازم تدفع 13.500 دولار أمريكي......... صح؟

هنا بقى يتدخل النظام الهامشي والرافعة المالية ويقولوا:

لالالالالالالالالالا

مش لازم

احنا عملنالك روافع مالية كالتالي هتسهل عليك الموضوع كتييييييييير:

لو معاك:
1% --- معناها رافعة 1:100 يعني لو معاك 135 دولار من 13500 دولار، هاخليك تشتري 10.000 يورو...

اضرب 135*100= 13.500
إذن مقابل 1% بس من قيمة اليورو الأوروبي بالدولار الأمريكي، وفرتلك 10.000 يورو وعيش بقى

0.50% --- معناها رافعة 1:200 يعني نص% (على نفس المثال السابق بتاع اليورو / دولار، يعني بنتكلم في 67.5 دولار)
0.25 - معناها رافعة 1:400 يعني ربع% (على نفس المثال السابق بتاع اليورو / دولار، يعني بنتكلم في 33.75 دولار)
0.20 -- معناها رافعة 1:500 يعني خمس% (على نفس المثال السابق بتاع اليورو / دولار، يعني بنتكلم في 27 دولار)

اقرأ الجزء بتاع الرافعة المالية دا اكتر من مرة عشان تهضمه صح


تعالى نأخد مثال واقعي بقى للي بيحصل في سوق الفوركس بالظبط:

هافترض معاك انك اتعلمت تحليل فني وفهمت الفوركس كويس، وحبيت تفتح حساب تداول حقيقي بقيمة 100 دولار مثلا...

هتعمل ايه في الحالة دي؟

هتشوف شركة وساطة كويسة وتكون سمعتها كويسة.. وهتفتح حساب عندهم بقيمة 100 دولار أمريكي مثلا، وهتختار رافعة مالية 1:100

الموضوع لا يستغرق ساعات لو معاك موظف مبيعات محترم

هافترض معاك انك حللت زوج اليورو مقابل الدولار الأمريكي وتوقعت ان الزوج هيطلع 100 نقطة خلال الفترة اللي جاية...

من المنطقي انك تشتري عشان تستفيد من التحرك اللي هيحصل.. صح كدا؟

هافترض معاك مثلا ان سعر اليورو / دولار = 1.3500
وبما ان مبلغ الايداع بتاعك (رأس مالك) مش كبير، يبقى اكيد مش هتشتري كمية اكتر من 1000 وحدة...

تعالى معايا شوف المعاملة هتمشي ازاي..


هتطلب من الشركة شراء كمية 1000 وحدة من زوج اليورو / دولار عند سعر صرف 1.3500

هتعمل ايه الشّركة؟

الشركة هتقسم حسابك إلى جزئين بعد حسم الاسبريد:



يعني ايه هامش محجوز؟
يعني عربون مسترد أو تأمين عشان يفتحلك الصّفقة وهو عبارة عن 1% (أو أي نسبة تحددها أنت بشرط ان شركة الوساطة تكون بتوفرهالك من ضمن الخيارات) من قيمة اليورو بالدولار الأمريكي ويحجز المبلغ من رأس مالك في الشركة..

يعني ايه هامش متاح؟
يعني اقصى مبلغ ممكن تخسره في الصّفقة إذا حصل إنعكاس في السّوق (يعني السوق تحرك عكس دخولك) ودا بيبقى عبارة عن المبلغ المتبقي من رأس مالك بعد حجز الهامش المحجوز..

طيب تعالى نتخيل ان سعر صرف اليورو / دولار انخفض إلى 1.3400
دا معناه ايه؟
معناه ان الهامش المتاح بتاعك اصبح 76.50 دولار
يعني لو اغلقت الصفقة بالمنظر دا.. هتلاقي ان حسابك اصبح 96.50 دولار.. يعني أنت خسران 10 دولار أمريكي.. تمام؟


طيب لو تخيلنا ان سعر صرف اليورو / دولار ارتفع إلى 1.3600
دا معناه ايه؟
معناه ان الهامش المتاح بتاعك اصبح 96.50 دولار
يعني لو اغلقت الصفقة بالمنظر دا.. هتلاقي ان حسابك اصبح 110 دولار.. يعني انت كسبان 10 دولار أمريكي.. تمام؟ ونفس القياس برضه لو زودت الكمية ولكن الربح طبعًا هيزيد..

دا ببساطة شديدة هو العمل بالنظام الهامشي.. أتمنى اكون وفقت في شرح الدرس الاول وانتظروني إن شاء الله في الدرس الثاني.. لو في اي استفسارات يا ريت تسأل وتأكد اني هاحاول اساعدك بكل ما عندي من علم.. مقابل كدا... نسألكم الدعاء وياريت تكون الكمية كاملة

تحياتي للجميع

شادي عبده



التوقيع:
حلم المليون

التعديل الأخير تم بواسطة شادي عبده ; 26 - 04 - 2014 الساعة 02:49 PM
شادي عبده متواجد حالياً   رد مع اقتباس
قديم 11 - 04 - 2014, 01:52 PM   #3
مشرف بورصات
 
الصورة الرمزية احمد ريان
 

افتراضي رد: الدرس الأول من دورة إزاي تكسب من سوق الفوركس؟

بالتوفيق للجميع ومشكور على الجهد مستر شادى



احمد ريان غير متواجد حالياً   رد مع اقتباس
قديم 11 - 04 - 2014, 03:21 PM   #4
موقوف
 

افتراضي رد: الدرس الأول من دورة إزاي تكسب من سوق الفوركس؟

مرحبا اخي شادي
شرح ينم عن خبرة ومبسط دون إخلال ويوصل المعلومة
ولكن عندي
BID=BUY
ASK=SELL
حسب وجهة نظر البنك - عندما يكون البنك هو ضمير المتكلم - وبناء عليه هذه المصطلحات في الكتب.

والله اعلم.
تنخول الذهن شوي.
انت كلامك دقيق 100% اذاكان ضمير المتكلم هو الفرد (الذي هو ضد البنك) - بنيت هذه المصطلحات على اساس لسان الفرد.
وبالتالي كلامك صحيح من جهة اسك و بد -
ولكن مانجده في الكتب (هل ضمير المتكلم هو البنك او الفرد) ؟

هي في الاخير وجهين لعملة واحدة - هل انت امام شبكة الصراف ام خلفها؟



شادي عبده likes this.
دانتال غير متواجد حالياً   رد مع اقتباس
قديم 11 - 04 - 2014, 03:22 PM   #5
عضو برونزي
 
الصورة الرمزية kalosha2
 

افتراضي رد: الدرس الأول من دورة إزاي تكسب من سوق الفوركس؟

شرح ولا اروع استاذ شادي تسلم ايدك

جمعة مباركة



احمد ريان likes this.
kalosha2 غير متواجد حالياً   رد مع اقتباس
قديم 11 - 04 - 2014, 03:35 PM   #6
موقوف
 

افتراضي رد: الدرس الأول من دورة إزاي تكسب من سوق الفوركس؟

اقتباس:
المشاركة الأصلية كتبت بواسطة دانتال مشاهدة المشاركة
مرحبا اخي شادي
شرح ينم عن خبرة ومبسط دون إخلال ويوصل المعلومة
ولكن عندي
BID=BUY
ASK=SELL
حسب وجهة نظر البنك - عندما يكون البنك هو ضمير المتكلم - وبناء عليه هذه المصطلحات في الكتب.

والله اعلم.
تنخول الذهن شوي.
انت كلامك دقيق 100% اذاكان ضمير المتكلم هو الفرد (الذي هو ضد البنك) - بنيت هذه المصطلحات على اساس لسان الفرد.
وبالتالي كلامك صحيح من جهة اسك و بد -
ولكن مانجده في الكتب (هل ضمير المتكلم هو البنك او الفرد) ؟

هي في الاخير وجهين لعملة واحدة - هل انت امام شبكة الصراف ام خلفها؟
غير عنوان موضوعك الى دورة للمتقدمين
الحق معك
ما في الكتب ضمير المتكلم هو الفرد.
برمجتها وتبين ان BUY=ASK
SELL=BID

الصورة أسفل تثبت أن الحق معك.



الصور المرفقة
نوع الملف: png X_02.png‏ (83.9 كيلوبايت, المشاهدات 12)
دانتال غير متواجد حالياً   رد مع اقتباس
قديم 11 - 04 - 2014, 03:41 PM   #7
عضو برونزي
 

افتراضي رد: الدرس الأول من دورة إزاي تكسب من سوق الفوركس؟

اقتباس:
المشاركة الأصلية كتبت بواسطة احمد ريان مشاهدة المشاركة
بالتوفيق للجميع ومشكور على الجهد مستر شادى

احمد ريان مشرف بورصات
والله اضافه كبيره لمنتدانا الرائع
وبالتوفيق لك اخى احمد على مسؤليتك الجديده تجاه المنتدى والاعضاء



التوقيع:





Ahmed El Sayed غير متواجد حالياً   رد مع اقتباس
قديم 11 - 04 - 2014, 03:44 PM   #8
عضو برونزي
 

افتراضي رد: الدرس الأول من دورة إزاي تكسب من سوق الفوركس؟

متابع معك اخى شادى
فاريد ان اعيد النظر فى طريقه تفكيرى تجاه سوق الفوركس
بالتوفيق



التوقيع:





Ahmed El Sayed غير متواجد حالياً   رد مع اقتباس
قديم 11 - 04 - 2014, 03:55 PM   #9
عضو محترف
 
الصورة الرمزية Rock
 

افتراضي رد: الدرس الأول من دورة إزاي تكسب من سوق الفوركس؟

السلام عليكم
بارك الله فيك ويجزيك كل الخير اخويا الكريم شادى
وبالتوفيق ان شاء الله للجميع

ولى تعليق / ازاى اسافر امريكا ومااصرف ولا سنت ده احتمال ارجع مديون . ماينفعش اتخيل معلش
.
.
متابع باقى الدروس



التوقيع:
من بالغ فى استسلامة ضاق فكره عن رؤية النجاح


توصيات هذا الشهر هنسميها " بتوصيات الحب والسعاده "
http://www.borsaat.com/vb/t1076007.html
Rock غير متواجد حالياً   رد مع اقتباس
قديم 11 - 04 - 2014, 04:35 PM   #10
عضو جديد
 
الصورة الرمزية عمر السائح
 

افتراضي رد: الدرس الأول من دورة إزاي تكسب من سوق الفوركس؟

اقتباس:
المشاركة الأصلية كتبت بواسطة دانتال مشاهدة المشاركة
غير عنوان موضوعك الى دورة للمتقدمين
الحق معك
ما في الكتب ضمير المتكلم هو الفرد.
برمجتها وتبين ان BUY=ASK
SELL=BID

الصورة أسفل تثبت أن الحق معك.
كل المصطلحات صحيحة حسب النية
كان عندي رد هنا في المنتدى اني عقدت صفقت بيع يورو دولار
أعتقد كلامي صحيح إذا كنت اقصد بيع العملة الرئيسية و هي اليورو

اقتباس:
المشاركة الأصلية كتبت بواسطة عمر السائح مشاهدة المشاركة
افضل نقطة وصل إليها السعر هي 1.3752 و خط الدعم الحالي لن يسمح بكسر هذا السعر لهذا قمت بتفعيل صفقة بيع عند نقطة الدخول 13754 الهدف 1.3814



عمر السائح غير متواجد حالياً   رد مع اقتباس
إضافة رد

جديد مواضيع منتدى تداول العملات العام


مواضيع سابقة :

اريد تحليل فني
【المضاعفات】 كشف حساب شخصى بـ 30 % شهرى + شرح الاستراتيجيه
الاقتصاد الاوروبي مابين التحفيز والانكماش

مواضيع تالية :

اعلان انضمام احمد ريان الى مشرفي بورصات
مجددا WWM من عنده تفسير
كيف يتم حذف المنصة من جذورها و حتى نهايت اطرافها

الدرس الأول من دورة إزاي تكسب من سوق الفوركس؟

أدوات الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are معطلة
Pingbacks are معطلة
Refbacks are معطلة


المواضيع المتشابهه
الموضوع المنتدى
درس الدرس الاول من دورة mms الفوتوشوب - فلاش - تصاميم - الجرافيكس
دورة احتراف الحساب التجريبي في الفوركس | خطوات هامة لكل مبتدء في الفوركس منتدى تداول العملات العام


روابط الموقع الداخلية


08:04 AM
Powered by vBulletin® Version 3.8.9
Copyright ©2000 - 2017, Jelsoft Enterprises Ltd.
Privacy Policy
SEO by vBSEO 3.6.0 ©2011, Crawlability, Inc.

الاتصال بنا - بورصات - الأرشيف - تنشيط العضوية - اعلن معنا - الأعلى    تحذير المخاطرة