السلام عليكم و رحمة الله و بركاته
بعد التحية لكل اعضاء المنتدي الرائع اللي اتعلمت بجد منه الكثير و الكثير , وبعد جزيل الشكر للدكتور اسامة اللي سمحلي اني استعير منه اسم الورشة واسم اني تلميذ من تلامذته في الفوركس , و بعد ثقته الغالية فيا اللي اتمني اني مش اخزله فيها ..
ان شاء الله يا جماعه هنبدا مع بعض ورشة عمل منفصلة عن عروس الابيض المتوسط ولكن بنفس اسس و مباديء هذه الورشة العظيمة اللي استفدت منها كثيرا
طبعا الكل هيقول طب ايه الفرق بين الورشة هنا و الورشة هناك ؟؟؟
الورشة هنا ان شاء الله هتكون للفريمات الصغيرة لجميع الازواج ان شاء الله و طبعا هناك الكثير من عشاق الفريمات الصغيرة و تحليلاتها و طبعا دكتور اسامة كما وعدني انه هيكون معانا ديما مؤيدا او مصححا لكلامي و طبعا لي الشرف انه يكون معايا في الورشة التي تحمل اسمه
و طبعا بدام هنتكلم عن فريمات صغيرة يبقي هنتكلم عن اهداف قليلة نسبيا و بالتالي برده ستوب لوز او وقف خسارة قليل نسبيا و هيبقي ان شاء الله الاهداف من 30 نقطه ل 50 نقطه و وقف خسارة من 40 ل 60 نقطه ان شاء الله
هناك قواعد لازم نتفق عليا جميعا حته يكون هذا العمل مثمر و مربح لنا جميعا
القاعده الاولي:
العمل لمدة شهر و ليس اقل من شهر علي حساب ديمو لا تنفذ عليه سوي صفقات الورشة بكل دقه و بدون اي صفقة خارجية و في نهاية الشهر يتم تحديد خطة العمل في الشهر القادم
القاعده الثانية:
اي فرصة سوف يتم ارفاق الشارت ليها و التحليل الوافي و الكافي عن سبب الدخول و ان شاء الله اقدر الحق ارفع الفرص سريعا لان الفريمات الصغيرة فرصها سريعة شوية بس ان شاء الله نقدر نظبط الموضوع ده
القاعده الثالثة:
لا يوجد مواعيد للصفقات ولا لوجودي في المنتدي ولكن انا تقريبا معظم الوقت موجود ولكن ان شاء الله هنحاول ناخد فرص واضحة و نسبة نجاحها كبيرة نسبيا
القاعدة الرابعه:
لا للدخول عكس الترند العام و ده من اول الدروس و اهمها في سنة من تعلم الفوركس و درس لن انساه من معلمي الدكتور اسامة لان اللي هيدخل في الحيطه مش هيرجع تاني منها
القاعدة الخامسة:
الالتزام الالتزام الالتزام بادارة راس المال و كل واحد عارف حسابه اكتر مني
و طلب اخير و رجاء من الجميع
يا جماعه انا اخوكم وواحد منكم و نشات فوركسيا في المنتدي ده و اتعلمت فيه و خبرتي في الفوركس لا تتجاوز 10 شهور و خبرتي ليست كخبرة الكثير هنا و لذلك ..
من لا يثق في لا يدخل معي الصفقات لاني اقولها ولا اخجل منها لا يوجد شخص في هذا المجال لا يخسر وانا اخسر و غيري يخسر ومن لا يخسر لن يتعلم
علشان كده كل اللي بطلبه بجد الدعم و التشجيع وانا بعد اول شهر لو اكتشفت اني مش اد المسئولية دي هقول يا جماعه انا اسف انا منسحب دون ان اسبب خسارة لاي شخص في ماله الحقيقي
ان شاء الله ستبدا الورشة قريبا في العمل و بفضل دعواتكم سنسير علي بركة الله و بفضله و ان شاء الله الي الارباح و ان شاء الله موفقين موفقين
ارجو اني اكون ضيفا خفيفا عليكم جميعا و ارجو اني اكون قادر علي المسئولية دي و ان شاء الله الي الامام دائما و ابدا
شكرا لكل من دخل هذه الورشة و شكرا لكل من ساعدني ان اتعلم و ما زلت اتعلم و سوف اتعلم و سوف اصل الي هدفي ان شاء الله
بالتوفيق للجميع.....
ورشة تلميذ عروس الابيض المتوسط و نسر مصر
